റിസര്‍വ് ബാങ്ക് നിര്‍ദ്ദേശങ്ങള്‍ പാലിക്കാതിരുന്നതിന് പെരിന്തല്‍മണ്ണ അര്‍ബന്‍ സഹകരണ ബാങ്കിന് 50ലക്ഷം രൂപ പിഴയിട്ടു. വരുമാന തിരിച്ചറിയല്‍, അസറ്റ് ക്ലാസിഫിക്കേഷന്‍ (ഐ.ആര്‍.എ.സി) മാനദണ്ഡങ്ങള്‍, വായ്പ അനുവദിക്കുന്നത് സംബന്ധിച്ച അര്‍ബന്‍ബാങ്കുകള്‍ക്ക് റിസര്‍വ് ബാങ്ക് പുറപ്പെടുവിച്ച നിര്‍ദ്ദേശങ്ങള്‍എന്നിവ പാലിക്കാത്തതിനാണ് പിഴ.
എന്നാല്‍, ഇടപാടുകാരെ ഒരുതരത്തിലും ഈ നടപടി ബാധിക്കില്ലെന്ന് റിസര്‍വ് ബാങ്ക് വ്യക്തമാക്കിയിട്ടുണ്ട്. ആര്‍.ബി.യുടെ റെഗുലേറ്ററി നടപടികളുടെ ഭാഗം മാത്രമാണ്. ബാങ്ക് ഉപഭോക്താക്കളുമായുള്ള ഏതെങ്കിലും ഇടപാടിന്റെയോ കരാറിന്റെയോ സാധുതയെ ബാധിക്കുന്നതല്ലെന്നും ആര്‍.ബി.ഐ. വ്യക്തമാക്കി.
ബാങ്കിന്റെ 2019 മാര്‍ച്ച് 31 ലെ കണക്ക് റിസര്‍വ് ബാങ്ക് പരിശോധനയ്ക്ക് വിധേയമാക്കിയരുന്നു. ഈ പരിശോധനയിലാണ് ബാങ്ക് ആര്‍.ബി.ഐ. നിര്‍ദ്ദേശങ്ങള്‍ പാലിച്ചിട്ടില്ലെന്ന് കണ്ടെത്തിയത്. നിര്‍ദ്ദേശങ്ങള്‍ പാലിക്കാത്തതിനെക്കുറിച്ച് റിസര്‍വ് ബാങ്ക് വിശദീകരണം തേടിയിരുന്നു. പിഴ ഈടാക്കാതിരിക്കാതിരിക്കാന്‍ കാരണമുണ്ടെങ്കില്‍ ബോധ്യപ്പെടുത്താനും അറിയിച്ചിരുന്നു. ഈ വിശദീകരണവും പരിശോധിച്ച ശേഷമാണ് പിഴ ചുമത്താന്‍ ആര്‍.ബി.ഐ. തീരുമാനിച്ചത്.
