ഇത്തവണയും 30,307 കോടിരൂപ കേന്ദ്രസര്‍ക്കാരിന് നല്‍കാന്‍ റിസര്‍വ് ബാങ്കിന്റെ സെന്‍ട്രല്‍ ബോര്‍ഡ് യോഗം തീരുമാനിച്ചു. ആര്‍.ബി.ഐ.യുടെ ലാഭവിഹിതത്തില്‍ നിന്നാണ് ഈ തുക കൈമാറുന്നത്. 2018-19 സാമ്പത്തികവര്‍ഷം ആര്‍.ബി.ഐ. 1.76 ലക്ഷം കോടി രൂപ സര്‍ക്കാരിനു നല്‍കിയിരുന്നു. ഇതില്‍ 1.23 ലക്ഷം കോടി ലാഭവീതമായിരുന്നു.
2022-23 സാമ്പത്തികവര്‍ഷം റിസര്‍വ് ബാങ്കിന്റെയും പൊതുമേഖലാ സാമ്പത്തികസ്ഥാപനങ്ങളുടെയും ലാഭവീതമായി ആകെ 73,948 കോടി രൂപയാണ് സര്‍ക്കാര്‍ ബജറ്റില്‍ പ്രതീക്ഷിച്ചിട്ടുള്ളത്. 2021-22 സാമ്പത്തികവര്‍ഷം 1.01 ലക്ഷം കോടിയായിരുന്നു ലഭിച്ചത്. കോവിഡ് വ്യാപനത്തിന്റെ ആഘാതം എല്ലാമേഖലയിലെ ബാധിച്ചതിനാലാണ് ഇത്തവണ ലാഭവിഹിതം കഴിഞ്ഞവര്‍ഷത്തേക്കാള്‍ 27 ശതമാനം കുറവ് പ്രതീക്ഷിച്ചത്.
ആര്‍.ബി.ഐ. ഇത്തവണ സര്‍ക്കാരിനുനല്‍കുന്ന ലാഭവീതം കഴിഞ്ഞവര്‍ഷത്തെ അപേക്ഷിച്ച് വളരെക്കുറവാണ്. ആര്‍.ബി. ഐ.യുടെ സാമ്പത്തികവര്‍ഷം ജൂലായ്-ജൂണ്‍ കാലയളവായാണ് കണക്കാക്കിയിരുന്നത്. അതിപ്പോള്‍ ഏപ്രില്‍-മാര്‍ച്ച് രീതിയിലേക്ക് മാറ്റിയിട്ടുണ്ട്. ഇതനുസരിച്ച് 2020 ജൂലായ് മുതല്‍ 2021 മാര്‍ച്ച് 31 വരെയുള്ള ഒമ്പതുമാസക്കാലയളവില്‍ 99,122 കോടി രൂപ ലാഭവീതമായി കഴിഞ്ഞവര്‍ഷം നല്‍കിയിരുന്നു. റിസര്‍വ് ബാങ്കിന്റെ വരുമാനത്തിലുണ്ടായ കുറവാണ് ഇതില്‍നിന്ന് വ്യക്തമാകുന്നത്. പണലഭ്യത കൈകാര്യംചെയ്യുമ്പോഴുള്ള പലിശയാണ് ആര്‍.ബി.ഐ.യുടെ പ്രധാന വരുമാനസ്രോതസ്സ്.
